” Miclos – A las Aurieros del Tems Bielh”
Louis Pujol – 1970.
Extrait : ” LE ROC DE L’ANDOURRA “
Les rocs que se dresson, ensa enlha, à Miclos e mèmo un chic pertout en Arièjo, an toutjoun agut, cad’un, la lhouro istouèro.
N-h-i a un flhoc que me benen à l’idègo : le Roc quilhat sus la Sèrro del mèmo noum, qu’on bets de lhènh, ount qu’on se trobe, quand n’es pos emboutissat per la brumo-basso; le Roc de l’Andourra, prochi del castèlh; le Roc de Quiè, ount jant las gents s’aturabon ande fè la rasounado; le Roc de la Bago, aimat dels baquiès, ount jant nous arrestabon, les jouns de bent ou de plhèjo; le Roc de las Barthos, ount jant troubabon les abajous les pus goustousis; le Roc de Carol, ount jant l’armado de Charlomanho se dibèc atura and’alenda, le joun que seguic les Moros que feguen ataussadis sus la jasso de Lha-Unardo; le Roc Blhanc, que mirgalho de blhanc les bosques berdousenquis de Mountagut; la Roco de Ribo-Lhoungo e la Roco de la Rauna, ount jant nous arremassabon toutis petitis, ande fè jocs ou ande nous amassa las prumièros flhous de la primo; la Roco, ount jant anabon garda las bacos, le maiti, abant d’ana à la ‘scolo parce que n’èro pos lhènh e ount jant las bèstios patarucos se nous abiabon, qualque cop, e se benion atura dins les camps de Plhanèlh; le Roc dels Mortis, à mieit cami entrans Nourrat e Arquisat, ount jant les omes abaichabon la caicho, le joua d’un enterroment.
Le Roc es le drapèu de la coumuno; on le bets de la balèo de la Bilo d’Ats coumo de las mountanhos d’Aulus e del colh de Port. Es d’achi que le senhou de Miclos courrespoundio, la nèit, and’s catèlhs de Lourdat, de Rabat e de Mountreal de Sos, en alhucan foc.
Quand èro petit, cado pic qu’ausio parla del Roc de l’Andourra, aquelh noum me fasio estrementi. Ero un andourran que l’abio pourtat d’Andorro sus l’colh e que l’abio abaichat achi ? Ou mèmo, èro un Andourran que s’èro cartrincat sus aquelh roc ? Nou’n sè ! Mè cado pic que i passabo debant me gaitabo se besio rouda, als entours, cap d’Andourran à la maichèlho mal rasado.
C. Barrière-Flavy nous a dit enca -e ja se pod plha que l’noum benio de so que, al tems dels senhous, les Andourrans que passabon les colhs e que trabessabon la balèo de Miclos, abaichabon les balots al pèd d’aquelh roc, le tems de bailha dos galhinos cad’un al senhou. Aco i ous dounabo le dreit de passa e de s’en ana cap à la plhano bendre la lhouro marchandiso.
Las gents cresion, tabes, qu’aquelhis rocs serbeichion à las brèichos ande teni l’sabat. Un maiti de la tardou, en 1918, un joube souldat de la classe 19 qu’èro bengut en permissiou abant de puja sus l’frount, s’en tournabo and’ana prene le trèn de cin ouros à Trascou. L’auta buffabo un chic; la plharando del joun se besio pos encaro e fasio escur coumo uno gorjo d’un lhoup. Quand nostre souldat fec en bisto del Roc dels Mortis, bic uno brèicho, ai pèd del roc, que s’emboustissabo dins un lhansol, ande l’espanta. Espantat, ja ne fec un chic : d’autris s’en siron fujidis camos adujats-me. Mès elh, un chic pus amount, ajèc bergounho. Un pas èro achi tampat and’un fèich d’espinasses. Nostre calhastre se prend le paichou e tourno debalha cap al Roc.
Quand fec arrans, cap de brèicho. Gaito ensa enlha, se besio res, e alabets, la tourno beire que s’èro boutado dins un camp de gabatch, plhe de gaudufous. S’aprocho d’elho, à gratipaudos, e la bic qu’abio estirat les lhansols pel sol, la un arrans l’autre, al cap de la ribo. Apèich la brèicho i boutèc dessus qualques gaudufous ande fè la prumièro courtado.
La sourcièro lhebèc le cap e bic nostre souldat, le paichou à la ma, que la se gaitabo fè.
– E que rue benes aduja, se i diguèc, qu’as saput qu’èro touto soulo ande battre le gabatch ?
La brèicho n’èro qu’uno fenno d’Arquisat, qu’abio le siu ome à la guèrro, e que s’èro lhebado de maiti ande proufita de l’auta. Coumo nou fasio pos plha joun, quand arribèc, abio desfèit les lhansols al pèd del Roc, abant de passa dins le camp, so qu’abio fèit creire al jun’ome qu’èro uno brèicho que cercabo à i fè pöu.
>>> Lire ” Miclos – A las Aurieros del Tems Bielh”